सावित्रीमाई !

सावित्रीमाई !
आज ती शिकली
स्वावलंबी झाली
वैचारिक झाली
इतकेच नाही तर
साता समुद्रा पार गेली
त्या चुल आणि मूल
या धर्मांध चौकटीला
बेधड़क ओलांडून.

सावित्रीमाई !
तू तिला जगायला शिकवले
जगवायला शिकवले
स्वाभिमानाने राहायला शिकवले
तिने तुला तिच्यात उतरवून
या पाखंडी संस्कृतीला
मुठ माती देत
दाही दिशा उजळून टाकल्या
त्या बद्दल
तुझे आभार सावित्रिमाई.
धर्म आणि कर्म यातला
धरती आणि आभाळ
इतका मोठा असलेला फरक
तू सिद्ध करून दाखवलास
ते ही तू
तुझ्या वाटे आड़ येणार्या प्रत्येकाला
विदूषक म्हणून.
मी सुन्न होतो माई
तुला वाचताना
समजुन घेताना
नतमस्तक होताना
आणि आमच्या माता भगिनी
सावित्रिच्या लेकी म्हणून
गौरवाने नांदताना.
आज स्त्री शिक्षणाचा
उगाच गाजावाजा होताना
तुझी पेरलेली ही मुळे
विस्तृत होत आहेत
याचाच आनंद.
सावित्रीमाई !
तुझे उपकार आम्हाला
फ़ेडणे शक्य नाही
पण तुझ्या कार्याचा
तुझ्या लढ्याचा
आणि नक्की विचारांचा वारसा
पुढे घेउन जाण्याचा
प्रयत्न करू
इतकेच आज तुला
वंदन करताना.

- राहुल सिद्धार्थ साळवे

"सावित्रीमाई फुले यांच्या 184व्या जयंती निमित्त त्यांच्या
कार्यास आणि विचारास विनम्र अभिवादन.."